تاند:(پنجشنبه شنبه، د حوت ۲۶ مه) د افغانستان لپاره د اروپایي ټولنې ځانګړي استازي توماس نیکلسن او مل پلاوي يې په لومړي ځل د طالبانو له کورنيو چارو وزير او د حقاني شبکې مشر سراج الدين حقاني سره، چې د نړيوالو ترهګرو په تور ليست کې شامل دی او امريکا پرې ۱۰ ميليونه ډالره جایزه ټاکلې، ليدلي دي.
د طالبانو د اعلامیې له مخې، په دې لیدنه کې نیکلسن په افغانستان کې امنیت د ډاډ او خوښۍ وړ وباله، ویې ویل:«زموږ راتګ د دې ښکارندوی دی چې افغانستان مو هېر نه دی او هڅه کوو چې تل د افغانانو ترڅنګ پاتې شوو.»
طالبانو د اروپايي ټولنې د ځانګړي استازي په قول ويلي: «اروپايي ټولنه د جګړې پلوي نه کوي، څوک جګړې ته نه هڅوي؛ بلکې د سوله ييز او باثباته افغانستان لپاره هڅې کوي او غواړي له طالبانو سره خپلې ستونزې د خبرو اترو او ګډ کار له لارې حل کړي.»
د طالبانو د کورنیو چارو سرپرست وزیر راغلي پلاوې ته د ښه راغلاست ترڅنګ د هغه مننه وکړه او دا ډول لېدنې یې د باور جوړونې په برخه کې اغېزمنې وبللي.
سراج الدين حقاني ډاډ ورکړی چې طالبان په خپلو کړو ژمنو ولاړ دی، هېچا ته به له افغان خاورې ګواښ نه پېښیږي او دوی هېڅکله هم د جګړې پلوي نه کوي.
هغه دغه راز ادعا کړې چې تېره شل کلنه جګړه د هېواد د ازادۍ لپاره مشروع مبارزه وه او اوس هم له نړۍ سره د مثبتو او نېکو اړېکو پاللو ته ژمن دي.
د اروپايي ټولنې سرچينو تراوسه پورې په دې اړه څه نه دي ویلي.