تاند (دوشنبه، د حوت ۲۳ مه) د افغانستان د پاسپورت عمومي ریاست د پاسپورت په ورکړه کې له یوه ځنډه وروسته اعلان وکړ چې سر له نن څخه په پلازمېنه کابل کې د پاسپورت توزیع بېرته پیل کېږي.
په پام کې ده چې په کابل کې د ورځې ۳۰۰ پاسپورټونه صادر شي.
د پاسپورت د عمومي ریاست مطبوعاتي مسوول شریف الله تسل وايي:«پخوا په کابل کې د پاسپورت د توزیع پروسه داسې وه چې موږ به هغو کسانو ته فوري پاسپورت ورکاوه چې د درملنې لپاره یې سفر کاوه او د ۳۰۰ تنو غوښتنلیکونه به مو انلاین ثبتول، دا پروسه به بیا پیل شی.»
د چارواکو په وینا، په ولایتونو کې هم د پاسپورټ د توزیع پروسه د نوي کال د رارسېدو په خاطر ځنډېدلې ده.
ښاغلي تسل په دې اړه وویل:«په ولایتونو کې د څه وخت لپاره موږ د پاسپورټ ورکړه ځنډولې ده. دا د درو ستونزو له کبله. لومړی په دې خاطر چې مالي کال په پای ته رسېدو دی، له دې امله به پروسه د څه مودې لپاره وځنډېږي، دوهم په ولایتونو کې ډېر اسناد راټول شوي چې باید وکتل شي او غور پرې وشي.»
په کابل کې کابو یوه اوونۍ وړاندې د پاسپورټ ورکړه وځنډېده. د طالبانو له واک ته رسېدو وروسته د ډېرې مودې لپاره د پاسپورټ دفترونه بند شول خو وروسته چې پرانیستل شول، د متقاضیانو د شمېر ډېروالي ته په کتو د پاسپورټ دفترونو د هغوی غوښتنو ته ځواب نه شوای ویلی، له همدې کبله د پاسپورټ دفترونه په ځلونو د پاسپورت د ورکړې پروسه ځنډولې ده.