تاند:(سې شنبه، د حوت ۱۷ مه) سیمه ییزو سرچینو ویلي چې پرون په نیمروز ولایت کې د افغانستان او ایران په ګډه پوله کې د طالبانو او ايراني پوله ساتو ترمنځ نښته شوې ده.
ويل کيږي، چې په دې یو ساعته نښته کې دوه ایراني پوله ساتي وژل شوي دي.
د سیمه ییزو سرچینو د معلوماتو له مخې، نښته د نيمروز ولايت په کنگ ولسوالۍ کې شوې او په لړ کې یې له سپکو او درنو وسلو څخه کار اخیستل شوی دی.
د طالب او ایراني چارواکو په دې اړه څه نه دي ويلي.
د تېرې قوس مياشتې په لسمه کې هم د ایران او طالبانو ترمنځ نښته شوې وه چې وروسته دواړو لوريو دا نښته ناسم پوهاوی وباله.
ایران په ښکاره د طالبانو د واکمنۍ ملاتړی دی، خو په عمل کې ورسره ستونزې لري او وخت په وخت دغه هېواد پر طالبانو ځينې فشارونه راوړي څو د دوی په حکومت کې د ایران نفوذي ډلې شاملې او د افغانستان اوبه په پریمانه او وړيا ډول دغه هېواد ته ور پریږدي خو طالبانو تر دې دمه د ایران د فشارونو په وړاندې مقاومت کړی دی.