تاند(یکشنبه، د حوت ۸ مه) د افغانستان او پاکستان ترمنځ سوداګري راکړه ورکړه له دوه نیم ملیارد ډالرو څخه یو ملیارد ډالرو ته راټیټه شوې ده.
د پاکستاني رسنیو د راپور له مخې، د دوو هیوادونو ترمنځ د سوداګري راکړو ورکړو د اندازې پر کمېدو د افغانستان – پاکستان د سوداګرۍ او صنایعو ګډې خونې ژوره اندېښنه ښودلې ده.
د افغانستان او پاکستان د سوداګري او صنایعو ګډې خونې په خپل راپور کې ویلي چې د سوداګرۍ لپاره د دوستانه پالیسۍ د نشتوالی، د بارتري (جنس په جنس) سوداګرۍ لپاره د مناسب میکانیزم نه موجودیت، نااغېزمنه پانګونه د ځینو نورو عواملو ترڅنګ د افغانستان او پاکستان ترمنځ د سوداګري راکړو ورکړو د کمېدو عوامل دي.
نژدې یوه اونۍ مخکې پاکستاني رسنیو راپور ورکړ چې د پاکستان مرکزي بانک د مالیې وزارت وزارت ته په یو لیک کې غوښتنه کړې چې د ډپلوماتیکو چینلونو له لارې له افغانستان سره د بارتري یا د جنس پر وړاندې د جنس د معاملو په اړه موافقې ته ورسېږي. دا په داسې حال کې ده چې افغانستان او پاکستان د بهرنیو اسعارو د کمښت له ستونزې سره مخامخ دي.
راپور همداراز په افغانستان کې د فعال بانکي سیستم نشتوالی بلل دلیل بلل شوی او ویل شوي چې اوس نړیوال انتقالات (د پیسو) د درېمګړي بانک په وسیله کېږي.
د دوو هیوادونو ترمنځ په تېرو شپږو میاشتو کې پاکستان څو ځلې د سپین بولدک او تورخم لارې بندې کړي چې له کبله یې سوداګرو سخت زیان کړی دی.
په همدې حال کې ټاکل شوې ده چې د طالبانو د حکومت د سوداګرۍ او صنعت سرپرست وزیر نور-الدین عزیزي سبا دوشنبې تورخم ته لاړ شي او د افغانستان او پاکستان د ترانزیت او سوداګرۍ پر مسایلو له پاکستاني چارواکو سره خبرې وکړي.
پاکستاني رسنیو ویلي چې په دې خبرو کې د پاکستاني پلاوي مشري به د سوداګرۍ او صنعیت په چارو کې د صدراعظم مرستیال عبدالرزاق داوود کوي او په غړو کې به یې د افغانستان لپاره د پاکستان ځانګړی استاز محمد صادق هم شامل وي.
افغان او پاکستاني پلاوي به د تورخم پر لاره د دروازې د پرانیستو د وختونو د زیاتولو، د تاسیساتو د جوړولو، مسافرانو او ناروغانو ته د تګ راتګ او افغانستان ته د بشري مرستو د استولو لپاره د نورو آسانتیاوو د چمتو کولو پر موضوعاتو بحث وکړي.