تاند: ( یکشنبه، د کب اتمه) د ملګرو ملتونو سازمان ويلي، چې افغانستان ته یې د غوښتې ۴ نیم میلیارده ډالره بشري مرستې ۱۲ سلنه تر اوسه را ټوله کړې ده.
په دې اړه د ملګرو ملتونو د ټاکل شوي اته کسیز پلاوي مشرې رینا ګيلاني ويلي، چې دوی د يادې مرستې د ټولولو او وېش څارنه کوي.
د نوموړې په وينا، تر اوسه د غوښتل شوې دې مرستې یوازې ۱۲ سلنه تامین شوې ده.
رینا ګیلاني په ورته وخت کې د دغې مرستې د سم وېش لپاره د څارنې د يوه ميکانيزم د جوړېدو خبر هم ورکړی دی.
نوموړې زیاتوي، چې تر اوسه يې په کابل، کندهار او پروان ولایتونو کې د مرستو د وېش څارنه کړې ده.
مخکې د سره صليب نړيوالې ادارې پر نړيوالو مرستندويانو او هېوادونو نیوکه کړې وه، چې افغانستان سره مرستې ته چندان لېوالتيا نه لري.
د ملګرو ملتونو د ارقامو په اساس، په افغانستان کې تر ۲۸ میليونو پورې خلک له سخت فقر سره لاس و ګریوان دي.