تاند: ( پنجشنبه، د کب پینځمه) د طالبانو د کورنيو چارو وزارت چارواکي وايي، چې په افغانستان کې به د ټاپي پروژې عملي چارې په نيږدې راتلونکو ورځو کې پیل شي.
د دغه وزارت په يوه اعلاميه کې راغلي، چې په دې اړه يې چارواکو پرون د ترکمنستان له سفیر خواجه عوضوف او د ټاپي پروژې له اجرائيه رئيس مایرات امانوف سره لیدلي.
د سرچينې د معلوماتو له مخې، د کورنیو چارو او دفاع وزارت له لورې د دوي سره د ټاپي پروژې بشپړ امنيتي پلان شریک شو.
اعلاميه زياتوي، چې د ترکمنستان سفیر او اجرائيه رئيس له امنيتي پلوه ډاډ څرګند کړ او ويې ویل: د ټاپي چارې نور بشپړ شوي او په نږدې راتلونکې ورځو کې به يې چارې عملا پیل شي.
ويل کيږي، چې د یادې پروژې چارې به په هرات ولايت کې پيل شي.
د ترکمنستان له لوري د ټاپي پروژې چارواکو څه موده مخکې په هرات کې د طالبانو له چارواکو سره هم د يادې پروژې د چارو د پيل په اړه لیدلي وو.