تاند (پنجشنبه، د حوت ۵ مه) د کندهار له سپین بولدک ولسوالۍ څخه د ترلاسه شویو راپورونو له مخې، طالب ځواکونو او پاکستانیو پوځیانو پر ډیوند کرښه پر یو بل ډزې پیل کړي دي.
له دې سره په یو و خت طالبانو د جګړې ځای ته کومکي ځواکونه استولي دي.
د راپورونو له مخي جګړه وروسته له هغه ونښته چي پاکستاني پوله ساتو یو افغان ماشوم، چې د کرښې پورې غاړې ته اوښتیس و، بد وواهه.
په ټولنیزو رسنیو کې په خپرو شویو ویدیوګانو کې طالب ځواکونه لیدل کېږي چې د جګړې سیمي ته روان دي او په سیمه کي عام ولس یې د ستایني لپاره راوتلي او په چکچکو یې بدرګه کوي.
په وروستیو کي د سپین بولدک – چمن ترمنځ په ویش دروازه کې له تلونکو – راتلونکو مسافرو او کاروباریانو سره د پاکستاني پوله ساتو د بدچلند راپورونه زیات شوي دي. تر دې څو میاشتې پخوا هم طالب چارواکو دا لار د پاکستاني ځواکونو د بد سلوک په خاطر بنده کړې وه.
تراوسه پورې د نښتې په نتیجه کې د مرګ ژوبلو په اړه څه نه دي ویل شوي.