تاند: ( پنجشنبه، د کب پینځمه) د ازبکستان په پلازمينه تاشکند کې د افغانستان د وضعیت په اړه د دغه هېواد د بهرنيو چارو وزير سره د اروپايي ټولنې د غړو هېوادونو د استازو غونډه ترسره شوه.
یاده غونډه، چې پرون جوړه شوې وه، د يوه پريکړه ليک په خپرولو پای ته ورسېده.
په پریکړه لیک کې د افغانستان سیاسي، ټولنیز او بشري وضعيت د اندیښنې وړ ګڼل شوی او ټینګار شوی، چې که د حل لپاره یې عاجلې هڅې ونه شي، د سیمې هېوادونو ته به یې خطر پراخ او منفي اغېزې ورسیږي.
د غونډې ګډونوالو له افغانستان سره د هر اړخیزو عاجلو مرستو د همغږۍ او تر سره کیدو له ټینګار سره، په دې هېواد کې د یوې سياسي او مشروع پروسې له لارې د داسې حکومت د جوړیدو غوښتنه کړې، چې د ټولو خلکو، په خاص ډول د ښځينه وو حقونه پکې خوندي وي.
په غونډه کې له افغانستان څخه سیمې او نړۍ ته د افراطيت، نیشه یي توکیو او نورو ګواښونو په لېږد انديښنه ښودل شوې او ټینګار شوی، چې د دغو ګواښونو د مهارولو لپاره نړیوالې همکارۍ باید تر سره شي.
د يادونې وړ ده، چې مخکې اروپايي ټولنې د ازبکستان په ترمز ښار کې افغانستان ته د بشري مرستو د لېږد د يوه مرکز د جوړولو خبر ورکړی و، خو په پرونۍ غونډه کې په دې اړه څه نه دي ويل شوي.