تاند: ( دوشنبه ، د کب دویمه) په ننګرهار کې د طالبانو ځايي چارواکو ويلي، چې د خپل عمومي مشر ملا هیبت الله اخوند زاده ( چې دوی یې امیرالمؤمنین ګڼي) د فرمان له مخې یې د ننګرهار له محبسه د کم عمره ځوانانو په ګډون ۹۰ سياسي او جنايي بنديان ازاد کړل.
د ننګرهار طالب چارواکو دغه راز د جلال اباد ښار په دويمه ناحیه کې د څه باندې ۲ زره ( کا) نيشه يي ګولیو په تور د یوه کس د نیولو خبر هم ورکړی.
په وروستيو کې له یو شمېر نورو زندانونو څخه هم طالب چارواکو د لسګونو بندیانو د خوشې کیدو خبر ورکړی.
مخکې طالبانو ويلي وو، چې د سیاسي بندیانو په توګه په زندانونو کې هیڅوک ورسره نشته.
معلومه نه ده، چې د سیاسي بندیانو په نوم خوشې شوي ننني کسان د طالبانو په واکمنۍ کې نیول شوي او که له مخکې څخه بنديان وو.