تاند: ( دوشنبه ، د کب دویمه) د پاکستان امنيتي سرچينو ډیوې راډیو ته ویلي، چې افغانستان ته یې د شمالي وزیرستان يو شمېر مشران په دې موخه لیږلي، څو د پاکستان د تحريک طالبان ډلې ( ټي ټي پي) سره د سولې مذاکرات وکړي.
سرچينې وايي، چې د قومي مشرانو دا ۱۰ کسیزه ډله خوست ولايت ته رسیدلې ده.
پاکستاني چارواکو منلې، چې ټي ټي پي سره د مذاکراتو په تېر پړاو کې یې د يادې ډلې نيږدې سل وسله وال له بنده خوشې کړي.
ويل شوي، چې د شمالي وزیرستان قومي مشران به د ی
خپلې سيمې د وسله والو مشر حافظ ګل بهادر او نورو مشرانو سره وویني.
په خوست کې د طالبانو د حکومت والي محمد نبي هم دې ولايت ته د شمالي وزیرستان د مشرانو یاد شوی سفر تاييد کړی دی.
د یادو خبرو د دوام خبر په داسې مهال ورکړل شوی، چې د پاکستان حکومت تېر ځل د افغانستان د طالبانو د کورنيو چارو د وزير مولوي سراج الدين حقاني په منځګړتوب له ټي ټي پي سره په خوست ولايت کې د پیل شویو مذاکراتو له مخې پیل کړی اوربند مات او د یادې ډلې پر ضد د عملياتو اعلان وکړ.
ټي ټي پي هم له اوربند ماتیدو وروسته د پاکستان پر امنيتي ځواکونو ګڼ بریدونه ترسره او درنه مرګ ژوبله ور واړوله.
ټي ټي پي د تازه پیل شویو مذاکراتو د راپورونو په اړه څه نه دي ويلي.