تاند: ( شنبه ، د دلوې دېرشمه) د طالبانو حکومت وايي، چې استخباراتي ځواکونو یې نن ناوخته په کابل ښار کې تښتول شوی مشهور ډاکټر احمد فواد پيرزاد د تښتونکو له منګولو آزاد کړی دی.
د طالبانو په یوه اعلامیه کې راغلي، چې د نوموړي د تښتولو په تور يو شمېر کسان نیول شوي او پلټنې ورڅخه روانې دي.
ډاکټر فواد پيرزاد د کابل طبي پوهنتون استاد هم دی او څه موده مخکې د کابل ښار په کارته چهار سیمه کې له خپل روغتيايي مرکز څخه تښتول شوی و.
له څه مودې راهيسې د هېواد په مختلفو سيمو کې د انسان تښتونې د پیښو د زیاتوالي خبرونه ورکول کيدل، خو په وروستيو کې د تښتول شویو کسانو د ژغورنې او په تور یې د یو شمېر خلکو د نیولو خبرونه ورکول کېږي.