تاند: ( جمعه ، د دلوې نهه ویشتمه) په کابل کې د ايران سفير بهادر امینیان وايي، چې هېواد يې په افغانستان کې هراړخيزې پانګونې او همکارۍ ته چمتو دی.
سفیر امينيان نن د طالبانو د اوبو او برېښنا وزير مولوي عبدالرحمن سره په ليدنه کې ويلي، چې افغانستان به د کرنې او مالدارۍ په برخو کې د ګاونډيو هېوادونو په همکارۍ بيرته ودان شي.
ايراني سفير دغه راز د افغانستان ابادي د سيمې د هېوادونو په ګټه ګڼلې ده.
د نوموړي په وينا د افغانستان کرنه او مالداري بايد له دوديزې بڼې څخه په عصري بڼې واړول شي.
د طالبانو د کرنې وزارت په يوه اعلاميه کې راغلي، چې ايراني سفير پر امريکا نيوکه کړې، چې د افغانستان د کرنې او مالدارۍ برخو ته يې په تېرو شلو کلونو کې خاصه پاملرنه نه ده کړې.
طالب وزير د افغانستان د کرنې او مالدارۍ ظرفيتونو ته په اشارې وویل، چې که پانګونه ورباندې وشي او ايران عصري وسايل واستوي، ډېر افغانان به په کار بوخت او د مهاجرتونو لړۍ به کمه شي.
ويل شوي، چې د ايران سفير په دې برخه کې د همکارۍ ډاډ ورکړی.