تاند: ( چار شنبه ، د دلوې اووه ویشتمه) د بحران نړیوالې ډلې په یوه تازه راپور کې ویلي، چې ۹۷ سلنه افغانان له فقر سره مخ دي او لویدیځ یې باید د ژغورلو لپاره به عاجل ډول د مالي مرستو اقدام وکړي.
دې نړیوال بنسټ په حواله، چې د طالبانو د واکمنۍ په شپږ مياشتينۍ موده کې د شدیدو فقر ځپلو افغانانو کچه ۲۳ میليونو ته رسیدلې ده.
دغه اداره خبرداری ورکوي، چې د فقر دا کچه که ژر یې غم ونه شي، د ۲۰ کلنې جګړې له تلفاتو ژیات خلک وژلی شي.
بحران نړیوالې ډلې د طالبانو له واکمنیدو وروسته، د خوراکي توکيو د بيو بې ساري لوړوالي، د بانکي خدمتونو سقوط او د افغانستان د بانکي زېرمو کنګلیدو ته هم اشاره کړې ده، چې په وینا یې د افغانستان د بشري ناورين د شدت نور عوامل دي او د حل لپاره یې ګامونه ضرور دي.
په وروستيو کې د پاکستان صدراعظم عمران خان هم د څو مرکو په وسيله ورته خبرداری ورکړی.
طالبانو دا ډول تازه څرګندونو ته غبرګون نه دی ښودلی، خو یو شمېر شنونکي د دوی د واکمنۍ د لومړیو میاشتو په نسبت د افغانستان په ټپه درېدلی اقتصادي څرخ اوس مخ په حرکت بولي او وايي، چې د فقر د کمولو لپاره اوس طالنانو سره له تعامل پرته بله لاره نشته.