تاند: ( چار شنبه ، د دلوې اووه ویشتمه) د تاجيکستان د انرژۍ د ادارې مشر محمد عمر آسو زاده ويلي، چې د افغانستان د برېښنا شرکت یې له هېواد څخه ۲۷ ميلیونه ډالره پوروړی دی.
د هغه په وينا، هېواد یې په پام کې لري، چې په روان میلادي کال کې هر ساعت افغانستان ته يو نيم ميليون کيلو واټه بریښنا ورکړي.
د ده په وينا، دوی به د هر کيلو واټ برېښنا په بدل کې ۴،۶۷ سنټه ډالره له افغانستان څخه تر لاسه کړي.
ویل کیږي، چې د جنورۍ له لومړۍ نېټې څخه افغانستان له تاجیکستان څخه د بریښنا له اړخه ۲۳ ميلیونه ډالره پوروړی و.
د معلوماتو له مخې، د طالبانو په واک کې د بریښنا شرکت په دومره موده کې يوازې د شپږ ميليونه ډالرو دغو پورونو په ورکړه بريالی شوی دی.
د ارقامو و مخې، افغانستان د خپلو اړتياوو د پوره کولو لپاره ۱۶۰۰ ميګاواټه برېښنا ته اړتيا لري، چې د دې اړتيا ۷۰ سلنه له ازبکستان، ترکمنستان، تاجيکستان او ایران څخه تر لاسه کوي او ۳۰ سلنه یې له خپلو داخلي سرچينو تامينيږي.
د افغانستان بریښنا شرکت د تاجیکستاني چارواکو د دغو څرګندونو په اړه څه نه دي ويلي.