تاند: ( دوشنبه ، د دلوې پینځه ویشتمه)‏ د افغانستان د ښځو یو شمېر بنسټونو د شاوخوا څلور زره افغان ښځو په استازيتوب د امريکا متحده ايالاتو ولسمشر جوبایډن ته لیک لیکلی او ترې غوښتي، چې د افغانستان د کنګل کړې بانکي زېرمې څخه د امریکا د سپټمبر د یوولسمې پېښې د قربانیانو کورنیو ته د تاوان اخيستو پریکړه بیرته واخلي.

 ياد شوی لیک څه باندې سلو افغان ښځو لاسليک کړی او پکې ټینګار شوی، چې د افغانستان له بشري ناورين سره هم مهاله، نه بايد امریکایي ولسمشر پر خپلې دې پریکړې ودريږي.

د افغان ښځو شبکې غړې شمایل زارع ويلي، چې د افغانستان د کنګل شوې بانکي زېرمې څخه د يادې پېښې قربانيانو ته د درې نیم میلیارده ډالرو تاوان بېلول یوه ظالمانه او د نه منلو وړ پریکړه ده.

افغان ښځو په دې ليک کې د افغانستان بد اقتصادي او بشري وضعيت ته په اشارې سره، له متحده ايالاتو دا هم غوښتي چې له افغانستان سره خپلې بشري مرستې ترسره او زیاتې کړي.

پرون د افغانستان پخواني ولسمشر حامد کرزي د يوه خبري کنفرانس له لارې له امريکايي ولسمشر څخه وغوښتل، چې خپله یاده پریکړه بیرته واخلي.

حامد کرزي له طالبانو هم وغوښتل، چې د کنګل شوې بانکي زېرمې د خلاصون په صورت کې يادې پيسې خوندي وساتي او په هیڅ برخه کې دې نه مصرفوي.