تاند: ( سې شنبه ، د دلوې دولسمه) د طالبانو حکومت پر نړيوالو بشري ادارو نيوکه کړې، چې د دوی په وینا د تېرو شلو کلونو جنايتونه يې له پامه غورځولي او د دوی ته د منسوبو وړو پیښو ډېر پوښښ کوي.
د طالبانو د حکومت د وياند مرستيال انعام الله سمنګاني پر خپل ټویټر ليکلي: له امنيت ټینګیدو څخه وروسته د بشري حقونو سازمانونه دې ته په تمه دي، چې کله يو کس وژل کیږي، څو دوی یې رپوټ کړي.
نوموړي زياته کړې: دوی دې لاړشي، د ۲۰ کلن اشغال د جنايتونو قربانيان دې پیدا او د هغوی له برخليک څخه نړۍ خبره کړي.
سمنګاني تور پورې کړی، چې دغو سازمانونو د ۲۰ کلونو پر جنایتونو پردې اچولي دي.
د سمنګاني دا څرګندونې په داسې حال کې دي، چې له څه مودې راهيسې د طالبانو پر خپلسرو نیونو او ادعا شویو وژنو په نړیواله کچه تورونه زيات شوي دي.
د ملګرو ملتونو سرمنشي څو ورځې مخکې د دغه سازمان د امنيت شورا په غونډه کې هغه راپورونه تاييد کړل، چې طالبانو د بيا واکمنۍ له ټينګښت سره يې د مخکيني حکومت تر سلو ډېر منسوبين وژلي دي.
طالبانو بيا دا ادعاوې ردکړي دي.