تاند: ( شنبه ، د دلوې نهمه) د طالبانو د بهرنيو چارو وزارت د سياسي مرستيال شېر محمد عباس ستانکزي نيږدې سرچينو په ټولنیزو رسنیو کې د هغه ژوند لیک خپور کړی، چې له مخې ېې هغه لومړی د برهان الدين په مشرۍ د جميعت اسلامي، بيا د عبدالرب رسول سياف په مشرۍ د اتحاد اسلامي او دغه راز د مولوي محمد نبي محمدي په مشرۍ د حرکت انقلاب اسلامي ګوندونو غړی پاتې شوی دی.
د هغه په ژوند لیک کې راغلي: شیرمحمد عباس ستانکزی د مرحوم حاجي پادشاه خان زوی، په 1338هـ ش کال د لوګر ولایت د برکي برک ولسوال په عباس کلي کې زیږېدلی دی.
عباس ستانکزي ابتدایي زده کړې د خپل کلي په جومات او د کابل په عمراخان ښوونځي کې ترسره کړي او د
کابل حربي ښوونځي څخه فارغ شوی دی.
نوموړی د سردار محمد داود خان لخوا د نورو افغان محصلینو سره یوځای د لوړو نظامي زده کړو لپاره
هندوستان ته ولیږل شو او په 1360هـ ش کال د تعلیم له بشپړولو ورسته د شوروي اشغال پرخلاف جهاد لیکو ته ور وګرځید.
عباس ستانکزي په جمعیت اسلامي او اتحاد اسلامي ګوندونو کې د نظامي استاذ په توګه دندې ترسره کړي، او په1364هـ ش کال د اتحاد اسلامي د جنوب لویدیځې حوزې نظامي آمر و.
نوموړي د قلات، د کندهارهوایي ډګر، د لښکرګاه او نورو لویو عملیاتو کې عملا برخه اخیستې او له هماغه وخته یې د ملابورجان، ملا مشر، ملا محمد رباني او نورو پخوانیو طالب مشرانوسره پیژندګلوي درلوده.
په1369هـ ش کال د حرکت انقلاب اسلامي ګوند د عمومي نظامي مسئول په توګه وټاکل شو او د
نجیب د حکومت تر سقوطه په همدې دنده پاتې شو.
ستانکزی د تنظیمي جګرو پر مهال په کور کښیناست، کله چې د طالبانو تحریک راپورته شو ورسره یوځای
شو.
هغه د طالبانو د واکمنۍ پرمهال لومړی دکندهار ولایت د خارجه ارتباط مرستیال و، بیا په کابل کې دبهرنیو چارو وزارت د معین او بیا د عامې روغتیا وزارت د معین په توګه دندې ترسره کړي.
دطالب رژيم له نسکورېدو وروسته، هغه د دغې ډلې په پلوۍ بیا په نظامي او سیاسي مبارزه لاس پورې کړی، په لومړي سر کې د طالبانو د سیاسي کمیسون غړی و، بیا یې مرستیال شو، د 2015م اګست څخه بیا
تر 2019م جنوري پورې د سیاسی دفتر رییس پاتي شوی.
ستانکزي له امریکا سره د طالبانو د سولې مذاکراتي ټیم مشري هم په غاړه درلوده، خو دا خبرې د سیاسي دفتر د مشر په توګه د ملا برادر له ټاکل کیدو وروسته بریالۍ شوې.
عباس ستانکزی اوس د طالبانو د رهبرۍ
شورا غړی، د بهرنيو چارو وزارت سياسي مرستيال او د سیاسي دفتر او مذاکراتي ټیم مرستیال دی.
له دې سره نوموړی د طالبانو د بهرنيو چارو وزير په توګه د مولوي امیر خان متقي له ټاکل کیدو سره څنډې ته شوی ښکاري او فعالیتونه یې ډېر کمرنګه ښکاري.
د عباس ستانکزي په اړه دا ادعا هم شته، چې د پخواني خلق دموکراتيک ګوند غړی و، خو هغه په رسمي ډول دا خبره رد يا تایید کړې نه ده.
د يادونې وړ ده، چې طالب مشران تر ډېره له دې کبله چې تعلیمي او سياسي سابقه يې ډېره کمرنګه ده، خپل ژوند لیکونه نه خپروي.