تاند: ( شنبه ، د دلوې نهمه) د پاکستان تر قلمرو لاندې د شهید شوي ملتپال پښتون مبارز ارمان لوڼي د شهادت درېيم تلين پوره شو.
نوموړی درې کاله مخکې په مرموز ډول شهید شو،چې د کورنۍ تر څنګ يې مبارزو ملګرو او د پښتون ژغورنې غورځنګ د وژلو پړه د پاکستان پر پوځ واچوله.
د نوموړي د شهادت تلین په داسې مهال نمانځل کېږي، چې د پاکستان حکومت تر اوسه هم د هغه د قاتلانو د نیولو په برخه کې کوم اقدام نه دی کړی.
پښتانه ملتپال دا پېښه خپله د پاکستان د پوځ کار ګڼي او د عاملينو د نيولو غوښتنه کوي.
د پښتون ژغورنې غورځنګ د فبرورۍ په دویمه د ارمان لوڼي لپاره د عدالت غوښتنې په موخه غونډه او لاريون کوي.
په دې غونډه کې به د دغه غورځنګ رهبر منظور پښتین هم ګډون او وینا ولري.
د ملي جمهوري غورځنګ ګوند مشر محسن داوړ پر خپلې ټویټر پاڼې لیکلي، چې ارمان لوڼي چارواکو ته د حقیقت ويلو جرئت درلود، د عدالت لپاره یې مبارزه کوله او په دې لاره کې یې ځان قربان کړ.
داوړ زیاتوي: هغه زموږ شهید دی، هیڅکله به یې هېر نه کړو.