تاند: ( شنبه ، د دلوې نهمه) ترکي رسنیو خبر ورکړی چې د ترکیې ۷۵۰ ټنه بشري مرستې چې خوراکي توکي، جامې او روغتیايي توکي په کې شامل دي، په دوو اورګاډو کې افغانستان ته ولېږدول شول.
د دوی د راپورونو په اساس، دغه مرستې به د ترکمنستان او ایران له لارې هرات ته ورسېږي.
د دغې مرستې د استولو اعلان څه موده مخکې د ترکیې د سرې مياشتې ادارې مسوولینو له طالب چارواکو سره د لیدنې پر وخت کړی و.
ياد شوي هېواد تر دې مخکې هم له افغانستان سره ورته مرستې کړې وې.
د ملګرو ملتونو د ارقامو له مخې، په افغانستان کې د طالبانو له واکمنیدو سره تر ۲۲ میلیونو پورې خلک فقر ځپلي او عاجلو مرستو ته اړتيا لري.