تاند(پنجشنبه، د جدې ۳۰مه) د پاکستان د پنجاب ایالت د مرکز لاهور ښار په یوه ګڼه ګوڼه مېنه کې چاودنې لږترلږه ۳ تنه وژلي او ګڼ نور ژوبل کړي دي.

د راپورونو له مخې، چاودنه په یوه موټرسایکل کې د اېښودل شوي بم په نتیجه کې په انارکلي سیمه کې شوې چې د لاهور تر ټولو له ګڼې ګوڼې ډکه سیمه ده.

د جرمني د ډي پي اې خبري اژانس د راپور له مخې، یوه سیمه ییز چارواکي محمدعثمان یونس وویل چې روغتون ته د ماشومانو په شمول ۲۶ ټپیان رسول شوي دي.

تراوسه پورې کومې ډلې د دې برید مسوولیت په غاړه نه دی اخیستی خو دا ډول بریدونه عموماً د پاکستاني طالبانو تحریک کوي. دې ډلې په وروستیو ورځو کې په پاکستان کې بریدونو ته زور ورکړی دی. دې ډلې وروسته دې بریدونو ډېر کړل چې د پاکستان له حکومت سره یې د بندیانو د خلاصون او د سولې خبرې بې نتیجې پای ته ورسېدې.

د پاکستاني طالبانو تحریک یا ټي ټي پي په پاکستان کې د اسلامي شریعت د نافذېدو لپاره مبارزه کوي.

د پاکستان حکومت پرون په لویو ښارونو کې د امنیتي تدابیرو د زیاتېدو اعلان وکړ.

د وروستي خبر له مخې، د بلوچ بېلتون غوښتونکو غورځنګ بلوچ نشنل ارمي اعلان وکړ چې دا برید دوی کړی دی.

د دې ملتپالې ډلې ویندوی په یوه ټویټ کې لیکلی چې نن یې د لاهور په اناکلۍ کې دښمن ته ګوزار ورکړی دی.