تاند:( پنجشنبه شنبه، د جدي دېرشمه) په ننګرهار کې د طالبانو چارواکي وايي، چې يو تن يې د انسان تښتوونکو له منګولو ازاد او پر تور يې درې تنه نیولي.
په ننګرهار کې طالبانو يوه امنيتي مقام مولوي عطاء محمد مبارز ويلي، چې د عثمان په نوم یې يو تن چې د انسان تښتوونکو له منګولو ازاد کړی و خپلې کورنۍ ته وسپاره.
ويل شوي، چې نوموړی کس ۴۶ ورځې وړاندې د جلال اباد ښار درېيمې ناحيې څخه تښتول شوی و.
د هغه د تښتونې په تور درې تنه نيول شوي، چې تر پوښتنو لاندې دي.
د طالبانو له واکمنیدو سره په افغانستان کې د انسان تښتونې د پیښو د زیاتوالي خبر ورکړل شوی.
له دې سره، د طالبانو له لوري نیږدې هره ورځ د افغانستان له یوې څنډې د انسان تښوونکو د نيول کيدو خبر ورکول کېږي.
شنونکي د طالبانو له واکمنیدو څخه وروسته، د ۲۴ میليونه وګړو فقر او د یو میلیون نورو وزګارتیا د جنايي جرمونو د زیاتیدو یو اصلي دلیل يادوي او له طالبانو غواړي چې له ځمکنيو واقعیتونو سره ځانونه عیار او له کړکیچن وضعیت څخه د افغانستان د خلاصون لپاره له مسلکي ظرفیتونو مرسته وغواړي.