تاند:( سې شنبه، د جدي اته ویشتمه) په هرات کې ځايي سرچينو ويلي، چې د طالبانو د امنیتي ځواکونو په ډزو پرون ماښام د یوه ډاکټر په ګډون ۲ ملکیان وژل شوي.
د سرچينو د معلوماتو له مخې، دا پېښه د هرات ښار د کاظمي سیمې کابل بانک ته څېرمه رامنځته شوې ده.
د عيني شاهدانو په حواله، طالبانو د يوې امنيتي پلټنې پر وخت د يوه سراچه موټر پر چلوونکي ډزې وکړې، چې د هغه تر څنګ د ډزو د شدت له کبله د پېښې ځای ته څېرمه د ډاکټر جلالي په نوم يو بل کس هم په ډزو ووژل شو.
طالبانو په دې اړه کوم غبرګون نه دی ښودلی.
په وروستيو ورځو کې له هرات، کابل او یو شمېر نورو ولايتونو څخه يو د ورته پېښو خبرونه زيات شوي.