تاند:( سې شنبه، د جدي اته ویشتمه) د طالبانو د حکومت د دفاع وزارت چارواکي وايي، چې د افغانستان ۱۳ ولایتونو ته یې د بهرنيو مرسته شویو غنمو د لېږد چارې پیل کړي دي.
د طالبانو د دفاع وزارت د ترانسپورت او تحرکاتو ملي ليوا قومندان مولوي بسم الله وايي، چې تر اوسه یې دوو ولایتونو ته مرسته شوي غنم لېږدولي او په نږدې راتلونکي کې به پاتې نورو ولایتونو ته د غنمو د لېږد لړۍ بشپړه کړي.
هغه د يادو غنمو په اړه نور جزییات نه دي ورکړي، چې دا غنم د طالبانو له حکومت سره مرسته شوي او دوی یې ویشي، که له نړيوالو مرستندويه ادارو سره یې په لېږد او وېش کې دوی مرسته کوي؟
د طالبانو پلویانو په ټولنیزو رسنیو کې د خپل دفاع وزارت دا کار ستایلی.
د يادونې وړ ده، چې په افغانستان کې تر ۲۴ میليونو پورې خلک له سخت فقر او اقتصادي ناورين سره مخ ګڼل کېږي.