تاند:( سی شنبه، د جدي يوويشتمه) د تاجيکستان ولسمشر امام علي رحمان وايي، چې هېواد يې له افغانستان سره په ګډه پوله کې د امنيتي کمربند د جوړيدو غوښتنه کوي.
نوموړي د ډله ییز امنیت د سازمان انلاين غونډې ته د وينا پر مهال ويلي، چې دغه امنيتي کمربند جوړيدل به د افغانستان په پوله کې د شته امنيتي ننګونو په کابو کولو کې ګټور تمام شي.
د روسیې سپوتنیک خبري اژانس د امام علي رحمان د څرګندونو په شننه کې ويلي، چې د افغانستان او تاجيکستان تر منځ ګډه پوله ورځ تر بلې د ډېريدونکو امنيتي ګواښونو شاهده ده.
سرچينه زياتوي، چې دغه ګواښونه ان د طالبانو د خپلمنځیو اختلافونو او جګړو د رامنځته کيدو تر حده دي او ګاونډي هېوادونه يې انديښمن کړي دي.
طالبانو د تاجيکستان د ولسمشر څرګندونو ته کوم غبرګون نه دی ښودلی، خو مخکې يې ټولو هېوادونو ته ډاډ ورکړی و، چې د افغانستان له خاورې به ورته ګواښ نه پېښېږي.
په وروستيو کې د تاجيکستان په ګاونډيو يو شمېر افغان سيمو کې د طالبانو د خپلمنځیو جګړو خبرونه هم ورکړل شوي، چې تر ډېره د څوکيو په وېش رامنځته شوي.