تاند:( دوشنبه، د جدي شلمه) دننګرهار په لعلپورې ولسوالۍ کې د هاوان مرمۍ چاودنې له امله ۹ ماشومان شهیدان او ۴ ټپيان شول.
په ننګرهار کې د طالبانو ځايي چارواکو ويلي، چې دا پېښه د لعلپورې ولسوالۍ بېګانانو کلي کې د جوارو پوليو پلورونکي له لوري د يوې زړې هاوان مرمۍ ټکولو له امله چاودنه رامنځته شوې ده.
سرچينې ويلي، چې د چاودنې په ترڅ کې نهه ماشومان شهيدان او څلور ټپيان شوي دي.
د طالبانو د خبرپاڼې له مخې، د پېښې ټپیان د درملنې په موخه د جلال اباد ښار حوزوي روغتون ته لېږدول شوي دي.
ځايي خلکو په دې اړه څه نه دي ويلي.
په وروستيو کې طالب چارواکي تورنيږي، چې د پېښو په اړه له خلکو واقعي معلومات پټوي.
د ځينو خبريالانو په وينا، طالبان تر ډېره حده د داعش ډلې بريدونو ته د اختطافګرو خلاف د عملياتو نوم ورکوي، چې دا تېر ويستونکي معلومات يې پر طالب وياندويانو د بې باورۍ سبب شوي دي.