تاند: ( پنجشنبه، د جدي شپاړسمه) د پاکستان ایکسپریس ټريبيون رسنۍ د خپلو سرچينو په حواله ويلي، چې د ترویکا راتلونکې غونډه د کابل پر ځای د روانې ميلادي مياشتې په پای کې د چين په پلازمېنه بيجينګ کې ترسره کيږي.
سرچينه زياتوي، چې په دې غونډه کې د متحده ايالاتو، روسيې، چين او پاکستان استازي د افغانستان د بشري ناورين په اړه خبرې کوي.
معلومه نه ده، چې په دې غونډه کې د دغو هېوادونو د کومې کچې چارواکي برخه اخلي.
ګومان کېږي، چې په دې غونډه کې به د افغانستان لپاره د دغو هېوادونو ځانګړي استازي ګډون وکړي.
مخکې د افغانستان لپاره د روسیې ځانګړي استازي ضمير کابلوف په کابل کې د يادې غونډې د ترسره کيدو خبر ورکړی و.
د طالبانو تر کنټرول لاندې باختر آژانس هم د ایکسپریس ټريبيون په حواله، په بيجينګ کې د ترویکا غونډې د ترسره کيدو خبر خپور کړی دی.