تاند: ( پنجشنبه، د جدي شپاړسمه) د بدخشان په مايمي ولسوالۍ کې د طالبانو د لیکو د تصفيې په غبرګون کې وسله واله نښته شوې، چې ۳ تنه پکې وژل شوي او ۴ نور ټپيان دي.
ځايي سرچینو ویلي، چې په نښته کې د يادې ولسوالۍ د جنايي آمريت اړوند ۲ طالبان او يو ملکي وګړی وژل شوي او ۴ تنه نور ټپيان شوي دي.
ويل شوي، چې نښته په مایمي ولسوالۍ کې د طالبانو د جنايي آمر صفا الدين او امنيه قومندان صلاح الدين تر منځ شوې ده.
ويل شوي، چې د نښتې دليل د طالبانو د لیکو د تصفيې کميسيون له لوري په ياده ولسوالۍ کې د طالبانو د استخباراتي مسوول د بدلون په سر ناندرۍ وې.
د طالبانو ځايي چارواکو او وياندويانو په دې اړه رسنيو ته څه نه دي ويلي.
تېره اونۍ د طالبانو د لیکو د تصفيې کميسيون وويل، چې تر دوه زرو زیات کسان یې له خپلو لیکو څخه تصفیه کړي دي.
د هغه په وينا په تصفیه شویو کسانو کې د داعش هغه غړی هم شامل و، چې طالبانو د دفاع وزارت د يوې برخې عمومي رییس ټاکلی و.
څه موده مخکې په کابل کې د چين سفير د طالبانو د رييس الوزرا له لومړي مرستيال ملا عبدالغني برادر سره د ليدنې پر مهال د دوی د ليکو په تصفيې ټينګار وکړ.
ويل کيږي، چې چين د طالبانو په ليکو کې د بهرنيو جنګياليو او ترهګرو په موجوديت انديښمن دی.
انشاءالله که خدای کول ټول ټالبان به همدارنګه یو په بل پسی تصفیه شی او خپلو لوړو ارمانونو ته به چی د افغانانو د وینو په سیلابونو کی ځانته حوری او غلمان راونیسی ورسیږی.