تاند: ( شنبه د جدي يوولسمه) د طالبانو د کورنيو چارو وزارت وايي، چې په ننګرهار کې ۱۹۴ تنه د جنایي جرمونو په تړاو نيول شوي.
د طالبانو د کورنيو چارو وزارت په یوه اعلامیه کې راغلي، چې یاد شوي کسان د تېرې یوې میاشتې په لړ کې له یو شمېر وسلو، وسایطو، مهماتو او جعلي پېژندپاڼو سره نیول شوي دي.
سرچينه دا هم وايي، چې نن په ننګرهار کې ۶ تنه د غلا په تړاو ونیول شول.
ويل کيږي، چې یاد کسان د بهسودو ولسوالۍ په اړوند سیمو کې د طالبانو د امنیتي ځواکونو له لوري نیول شوي دي.
د ننګرهار ځايي طالب چارواکو هم دا موضوع تایید کړې ده.
د اقتصادي او بشري ناورين او بې کارۍ شدت او په امنیتي ادارو کې د مسلکي کادرونو نه موجوديت د جنایي پېښو د زیاتېدو عمده علتونه ګڼل کېږي.