تاند: ( جمعه د جدي لسمه) د روسیې د بهرنیو چارو وزیر سرګي لاروف په یوه تازه مرکه کې طالبانو ته ويلي، چې که د رسميت پېژندلو تمه لري، نړيوالو سره دې پر خپلو ژمنو عمل وکړي.
د روسیې د سپوتنیک خبري اژانس په حواله، نوموړي د ټول شموله حکومت جوړول، د ترهګریزو ګواښونو پر وړاندې موثره مبارزه او د نيشه يي توکيو د خطر ختمول له هغو شرطونو ګڼلي، چې روسېې او نړۍ طالبانو ته د هغوی د حکومت د په رسميت پېژندلو لپاره وړاندې کړي.
سرګي لاوروف په تازه مرکه کې دا هم رد کړې، چې ګواکې د دوی هېواد به تر نورو هېوادونو د مخه د طالبانو حکومت په رسمیت وپیژني.
دا څرګندونې په داسې حال کې شوي، چې څو ورځې مخکې د افغانستان لپاره د روسیې ځانګړي استازي ضمير کابلوف د طالبانو د واکمنۍ د په رسميت پېژندلو موضوع یوه سمبولیکه خو جریان لرونکی بهیر وباله.
لاوروف په دې مرکه کې تر ډېره د طالبانو د واکمنۍ دفاع کړې وه.
ډ سرګي لاوروف تازه څرګندونې د کابلوف د خبرو په رد کې مطرح شوې ښکاري.
د طالبانو ویاند ذبیح الله مجاهد څو ورځې مخکې وويل، چې په روسيه کې به زر د خپل حکومت نوی سفیر معرفي کړي.
روسي چارواکو په دې اړه څه نه دي ويلي.
سياسي شنونکی افراسياب خټک باور لري، چې له طالبانو سره له پاکستان پرته د نورو ټولو سیمه ییزو هېوادونو ملاتړ په دې خاطر و، چې له سیمې د امریکايي ځواکونو په ایستلو کې ورسره مرسته وکړي.
د هغه په وينا، چې نور ټول هېوادونه په موقت ډول د طالبانو ملګري شوي وو او تمه نشته، چې طالبانو سره به د دغو هېوادونو ملګرتيا ډېر وخت دوام وکړي.