تاند: ( پنجشنبه د جدي نهمه) په ننګرهار کې د طالبانو چارواکي د دې ولايت د هندو باورانو له خولې وايي، چې ننګر هار ته له بهر څخه اهل هنود هېوادوال بېرته راستنیږي.
په ننګرهارکې د طالبانو د والي مولوي محمد داود مزمل دفتر ویلي، چې دا خبره والی مزمل سره د ليدنې پر مهال جلال اباد ښار کې د اهل هنودو هېوادوالو کلانتر جسبير سنګهـ حکيم زاده کړې ده.
سرچينه وايي، چې دغه هندوان او کورنۍ به یې ډير ژر له بهر څخه بېرته هېواد ته را ستنې شي.
د طالبانو په اعلامیه کې د هندو باورو په حواله ویل شوي، چې د طالبانو له تېرې واکمنۍ هم
ښې خاطرې لري او غواړي پاتې ژوند به هم په خپل هېواد کې تېر کړي.
د طالبانو والي اهل هنودو هېوادوالو ته د دوی د امنيت، خونديتوب او حقونو ته د پاملرنې ډاډ ورکړی او هېواد ته د بېرته راګرځيدو د ادعا شوې پرېکړې هر کلی او ستاينه يې کړې.
خپله افغان هندو باورو په دې اړه څه نه دي ويلي.
د طالبانو له واکمنیدو سره د ډېرو نورو افغانانو تر څنګ يوه برخه هندو باوره افغانان هم له هېواده وتلي.
طالبان دوی او نور افغانان په داسې مهال بيرته هېواد ته راتلو ته هڅوي، چې د ملګرو ملتونو د ارقامو له مخې په افغانستان کې تر ۲۴ میلیونو پورې خلک سخت فقر ځپلي او ميليونونه نور د لوږې له کبله د مرګ ګواښ سره مخامخ دي.