تاند: ( چار شنبه، د جدي اتمه) د افغانستان لپاره د روسیې د ولسمشر ځانګړي استازي ضمير کابلوف په يوه تازه مرکه کې د افغانستان د وروستي وضعيت په اړه غږيدلی.
نوموړي د طالبانو د حکومت په اړه ويلي، چې په تدريجي ډول د رسميت پېژندلو په درشل کې دی.
ډ هغه په وينا، د روسیې په ګډون نیږدې لسو هېوادونو په کابل کې خپل سفارتونه پرانیستي ساتلي او طالبانو سره دیپلوماتیکې اړیکې لري.
د روسیې د ولسمشر ځانګړي استازي دغه راز ویلي، چې د طالبانو د حکومت مدیریت مناسب نه، بلکې بد دی خو په وینا یې سمدستي داسې کومه بالقوه ډله نشته، چې د دوی واکمني وننګوي.
د کابلوف په خبره، داعش ډله سره له دې چې طالبان یې د ځپلو لپاره کافي هڅې کوي او په دې برخه کې لاسته راوړنې هم لري، طالبانو ته سمدستي لوی ګواښ دی.
ضمير کابلوف د احمد مسعود په مشرۍ د طالبانو پر ضد د پنجشېر د مقاومت جبهه د يوه واقعي لوري په نسبت تر ډېره مجازي ډله ګڼي.
د روسیې د ولسمشر ځانګړی استازی خبرداری ورکوي، چې که طالبان په روان ژمي کې د اقتصادي او بشري ناورين په مهارولو ونه توانیږي، له دوی څخه د خلکو مخ اړول به د پنجشېر مقاومت ډلې د پیاوړتیا او د کورنۍ جګړې پر لور د افغانستان د بيولو سبب شي.
د ولادیمیر پوتین استازی د ټول شموله حکومت په اړه وايي، چې سمدستي یې طالبانو نه تمه هم نه کيږي، چې خپل پروني دښمنان د ننني واک شریکان کړي، خو ټینګار کوي چې روسیه په واک کې د ټولو افغان سیاسي او قومي لوړیو شاملول غواړي.
ضمير کابلوف په دې مرکه کې ولسمشر غني او ټیم یې د افغانستان د سیاسي معادلو څخه د باندې وتي خلک ګڼلي او دا هم وايي، چې دوی په ټول شموله حکومت کې د سیاسي او قومي لوریو د شاملولو په اړه مشخص کسان نه وړاندیزوي.
د روسیې په باور، ضرور نه ده چې د قومي او سیاسي لوریو استازيتوب به بيا هم پخواني سياستوال کوي، بلکې ښه به وي چې ځوان استازي یې میدان ته راوستل شي.
هغه په ورته وخت کې ويلي، چې د نوي میلادي کال د لومړۍ مياشتې د پای او بلې د پیل په درشل کې به د ترویکا ډلې غونډه په کابل کې ترسره شي.