تاند- چینايی ساینسپوهانو یو ماشین اختراع کړی چې د مصنوعي ذهانت په مرسته د څارنوال کار کوي.
دوی ادعا کوي چې دا به په نړۍ کې د مصنوعي ذهانت په وسیله لومړنی ماشین وي چې د انسان جرمونه به څېړي.
له مصنوعي ذهانته په نړۍ کې، په تېره بیا امریکا کې له ډېرو کلونو راهیسې د قانون د تطبیق لپاره کار اخیستل کېږي خو چینايي ساینسپوهان وايي چې د دوی له لوري اختراع شوی ماشین هوبهو د یوه څارنوال کار کوي.
په دې اړه څېړنه د چین په منیجمینټ ریفیو (Management Review) کې خپره شوې ده.
د مصنوعي ذهانت څارنوال د دوسیې شفاهي توضیحاتو ته په کتو د یو کس د جرم په اړه تور اعلانوي. دوی وايي چې د دغه ماشین تور په سلو کې ۹۷ دقیق دی.
دا ماشین د شانګهای د پودونګ د سیمې د څارنوالۍ لپاره جوړ شوی او همالته ازمېښت شوی دی.
د چین د علومو اکاډیمۍ څېړونکي وايي چې دا ماشین د څارنوالانو د کار اندازه کموي او له هغوی سره د دوسیو په حل کې مرسته کوي.