تاند:( يکشنبه، د جدي پینځمه) د پکتیا ولایت د مرکز ګردېز ښار د ښاروالۍ مارکېټ په سیمه کې پرون مازیګر ناوخته وسله والو کسانو یو ځوان په ډزو وژلی.
ځایي سرچینو ویلي، چې دغه ځوان اقبال نومیده او پرون په ډزو وژل شوی.
د پکتیا د امنیه قومندانۍ طالب چارواکو ویلي، چې د وژونکو هویت نه دی معلوم، خو دوی یې په لټه دي.
د طالبانو له واکمنیدو سره که څه هم جګړه تر ډېره حده ختمه شوې، خو ورته هدفي وژنې زیاتې شوي او خلک یې اندیښمن کړي.
د ملګرو ملتونو د بشري حقونو د ادارې په یوه راپور کې څه موده مخکې د سلو داسې وژنو څېړنو ښودلې وه، چې د ۷۷ وژنو مسوول یې طالبان دي.
طالبانو بیا دا راپور رد کړی و.
د تېرې جمعې پر ورځ د حزب اسلامي ګوند مشر ګلبدین حکمتیار د جمعې ورځې د لمانځه په خطبه کې پر طالبانو نیوکه وکړه، چې له واکمنیدو سره یې هدفي وژنې زیاتې شوي او عاملین یې نه معلومیږي.