تاند:( چار شنبه، د جدي لومړۍ) د کاناډا د پراختيا وزارت له افغانستان سره د بشري ناورين د مقابلې لپاره د ۵۶ میلیونه امریکایې ډالرو د مرستې اعلان وکړ.
دا مرسته د ملګرو ملتونو او نړيوال سره صليب کمېټې د مرستې ټولولو له ګډ کمپاين سره د همکارۍ په توګه شوی.
کاناډايي چارواکو ویلي، چې دغه مرسته به یې د نړیوالو مرستندویه ادارو په وسيله په افغانستان کې ولګول شي.
ملګرو ملتونو په تازه ګام کې د افغانستان د بشري ناورين د مقابلې لپاره په کال کې څلور نیم میلیارده ډالره غوښتي.
د دغه نړيوال سازمان د ارقامو په اساس تر ۲۴ ميليونه پورې افغانان ډوډۍ نه لري او که په عاجل ډول يې لاسنیوی ونه شي، میلیونونه ماشومان به د خوارځواکۍ، سختې يخنۍ او سرپناه د نه لرلو له کبله مړه شي.
افغانستان د فقر او کرونا ترڅنګ په ژمي کې د ورښتونو له کبله د لویو لارو له بندیدو، د میلیونونو داخلي بې ځايه شويو د سرپناه له نشتوالي او نورو ستونزو هم ځوريږي.
افغانان په ډېر حسرت تمه لري، چې نړیوالې مرستې په عاجل ډول ور ورسيږي او د دغو ناورينونو له اغېزو يې خوندي کړي.
نړيوالو په دې برخه کې د مرستو ژمنې او ځینې عملي ګامونه اخيستي، خو د طالبانو له حکومت سره یې د اړیکو د نشتوالي له کبله دغه بهير له خنډونو سره مخامخ ګڼل کېږي.