تاند:( سې شنبه، د قوس دېرشمه) په کابل کې سلګونو تنو د امریکا د تړل شوي سفارت مخې ته د لاريون پر مهال له امریکا متحده ایالاتو څخه د افغانستان د شاوخوا ۱۰ ميليارده ډالرو بانکي زېرمې د خلاصون غوښتنه وکړه.
دوی، د امريکا ياد شوی عمل د بشري حقونو نقض وباله او دغه هېواد یې د افغانستان د بشري او اقتصادي ناورين عامل یاد کړ.
د دغه لاريون پر مهال طالبانو د ښار يو شمېر لارې د امنیت ساتلو لپاره تړلې وې او د نورو لاریونونو برعکس، چې د طالبانو په خلاف وې، د ممانعت پر ځای یې د طالبانو له لوري ملاتړ وشو.
ځينو رسنيو د یو شمېر دولتي ادارو د کارکوونکو په حواله خبر ورکړی، چې طالب چارواکو په زوره دغه لاریون کې ګډون ته اړ ويستي وو.
طالبانو د دغو ادعاوو په اړه غبرګون نه دی ښودلی، خو ځينو وياندويانو یې د لاریون ویډیو خپره کړې ده.
د امريکا د بهرنيو چارو وزارت وياند څه موده مخکې وويل، چې د دغو کنګل شویو پیسو په اړه پریکړه ستونزمنه شوې او دا کار به اوس د امريکا عدلي او قضايي نظام کوي.
د امريکا محکمې ته د سپتمبر د یوولسمې پېښې د شاوخوا یو نیم سل قربانيو د کورنيو وکیلانو شکايت کړی او ویلي، چې د افغانستان د کنګل شویو دغو پيسو ۷ میلیارده یې باید دوی ته د سپتمبر د یوولسمې پېښې د جبران خسارې په توګه وړکړل شي.
د يادې پېښې پر وخت طالبان پر افغانستان حاکمان وو او د القاعده مشر اسامه بن لادن ته یې، چې د پېښې په ترسره کولو تورن و، پناه ورکړې وه.
طالبانو د امريکايي قربانیو د کورنيو دغې ادعا ته غبرګون نه دی ښودلی، خو د رييس الوزرا مرستيال یې مولوي عبدالغني برادر ویلي: دغه پیسې د اشرف غني نه وې، د افغانستان د خلکو وې او باید افغانانو ته وسپارل شي.