تاند:( يکشنبه، د قوس اته ویشتمه) د ترکیې د بهرنيو چارو وزير داوود چاوش اوغلو د افغانستان د بشري ناورين په اړه د اسلامي هېوادونو د همکاريو سازمان په غونډه کې، له دغو هېوادونو وغوښتل چې د دغه ناورين د مقابلې لپاره پر خپلو ژمنو ودرېږي.
د هغه په وينا، که دغه ژمنې عملي نه شي، د افغانستان ۶۰ سلنه فقر ځپلي خلک به بدو پایلو سره مخامخ شي.
هغه ټينګار وکړ، چې د دغو خلکو لاسنیوی د اسلامي هېوادونو اخلاقي او شرعي مسؤلیت دی.
ترکي وزیر په ځانګړي ډول افغانستان ته د نقدو پيسو استول د اقتصادي نظام د سقوط د مخنيوي لپاره اړین وګڼل.
طالبانو تر څو ورځو مخکې پورې ان د خپل رییس الوزرا د مرستيال په کچه د بشري ناورين په اړه راپورونه بې بنسټه ګڼل.
نن د دوی د بهرنيو چارو وزير مولوي امیر خان متقي په اسلام اباد کې د دغه ناورين په اړه جوړه شوې اسلامي غونډه کې له هېوادونو وغوښتل چې عاجلې مرستې ورسره وکړي.
يو شمير افغان سياستوالو بیا ویلي، چې پاکستان د پخوا په شان د مرستې ټولولو دا هڅې هم د افغانستان په نوم د ځان لپاره پيل کړي.