تاند:( شنبه ، د قوس اووه ویشتمه)‏‏‏ د طالبانو د بهرنيو چارو وزير مولوي امیر خان متقي، چې په اسلام اباد کې د افغانستان د بشري ناورين په اړه د اسلامي همکاریو سازمان په غونډه کې د ګډون لپاره په یوه بوخت سفر تللی، له کنفرانس څخه مخکې د طالبانو د يوه معنوي پلار او مرشد مولانا فضل الرحمن دربار ته ورغلی.

پاکستاني رسنيو د هغه د دغه ورتګ ویډیوګانې خپرې کړي او ويلي، چې په دې لیدنه کې امیر خان متقي له مولانا فضل الرحمن څخه په نړیواله کچه د طالبانو د همیشني ملاتړ له کبله مننه کړې او فضل الرحمن دعا ورکړې، چې په افغانستان کې جوړه شوې اداره یې کاميابه شي.

مولانا فضل الرحمن د اکوړه خټک د حقانيه مدرسې له بنسټګر مولانا سميع الحق څخه وروسته د طالبانو دویم معنوي پلار ګڼل کېږي.

هغه تل په خپلو ویناوو کې د افغانستان د جمهوري نظام خلاف د طالبانو د جګړې ملاتړ کاوه او « جهاد» بې باله.

فضل الرحمن، خپله په پاکستان کې د جمهوري نظام له سرسختو ملاتړو څخه دی، چې اوږده موده د ټاکنو له لارې د پارلمان غړی پاتې شوی او يو ځل خو یې د ولسمشرۍ څوکۍ ته هم نوماند شوی و.

هغه، چې د پاکستاني استخباراتو له سترو مفتیانو ياديږي، په دې تورن دی چې د همدغې شبکې په امر یې افغانستان ته د پاکستاني سياستونو د عملي کیدو لپاره د طالبانو ډله رامنځته کړې او د یوه مذهبي مرشد او معنوي پلار رول یې ورته ادا کړی دی.

فضل الرحمن او د پاکستاني استخباراتو نور مفتیان له دې کبله تر سختو نيوکو لاندې دي، چې په پاکستان کې د واکمن انګريزي قانون او نظام د نسکورولو او شرعي نظام د حاکمولو لپاره د پاکستان د تحريک طالبان د جهاد تخریب کوي او د افغانستان د طالبانو په شان هغوی ته د ملاتړ لاس نه ورکوي.

طالبانو د فضل الرحمن دربار ته د ملا متقي د ورتلو په اړه ملت ته وضاحت او قناعت نه دی ورکړی.

په وروستيو کې د پاکستاني سياستونو او اجنداوو د عملي کولو او د پاکستان په پینځمې صوبې د افغانستان د بدلولو په هڅو د طالبانو د تورنیدو ادعاوې زياتې شوي.

دغه ډله بيا ځان خپلواکه ګڼي او په دې اړه پر خپل ضد څرګندونې بې بنیاده بولي.