تاند:( دوشنبه ، د قوس دوه ويشتمه) د طالبانو د بهرنيو چارو وزارت سرپرست مولوي امير خان متقي ویلي، چې له امريکا متحده ايالاتو سره د القاعدې او داعش ډلو په خلاف د طالبانو د همکارۍ تصور هم نه شي کیدای.
هغه يوه بهرني اژانس ته په تازه مرکه کې د امریکايي چارواکو هغه څرګندونې هم رد کړی، چې ګواکې په افغانستان کې د ترهګریزو ډلو فعاليتونه زيات شوي او امريکا ته یې ګواښ پېښ کړی.
طالب وزير په دې اړه د امریکايي چارواکو څرګندونې بې بنسټه ګڼلي او ویلي، چې په دې اړه بايد اسناد وړاندې کړل شي.
د طالبانو دغه لوړپوړي چارواکي دا هم ويلي، چې له امريکا متحدو ايالتونو سره يې د دوحې تړون عملي کړی او په دې برخه کې د نقض تورونه پرې واقعيت نه لري.
طالبانو تر اوسه هيڅکله په ښکاره نه دي ويلي، چې له القاعدې ډلې سره يې اړيکې پرې کړي.
له داعش ډلې سره د طالبانو دښمني بيا علني ده او طالبان دا ډله فتنه ګره ګڼي او په ځپلو يې ټينګار کوي.