تاند:( یکشنبه ، د قوس يو ويشتمه)‏‏‏ ‏د پاکستان په پارلمان کې د پښتنو ملتپالو مخکښ استازي او د ملي جمهوري غورځنګ مشر محسن داوړ د افغانستان د وضعیت په اړه د ملګرو ملتونو نړيوال سازمان ته لیک استولی دی.

په دې لیک کې نوموړي له طالبانو سره د دوحې د تړون په يو اړخيزه توګه ترسره کیدو او پکې د افغانستان د هغه مهال د‌ جمهوري نظام او خلکو نه موجوديت تر پوښتنې لاندې راوستی.

ښاغلي داوړ، د یاد شوي تړون په وړاندې د ملګرو ملتونو بې تفاوتي هم نقد کړې ده.

نوموړي افغانستان د طالبانو او بهرنيو ملاتړو له لوري یې اشغال شوی ياد کړی.

محسن داوړ په دې لیک کې د طالبانو له واکمنیدو وروسته، په افغانستان کې د سياسي، اجتماعي او اقتصادي ناورين يادونه کړې او ويلي، چې دغې ډلې په خاص ډول ښځې حذف کړي او ټول حقونه يې ترې تروړلي دي.

د ملي جمهوري غورځنګ مشر په دې لیک کې د‌ طالبانو پر وړاندې د افغانو ښځو مقاومت ستایلې او له ملګرو ملتونو يې غوښتي چې د دغو ښځو د حق غوښتنې د مبارزو ملاتړ وکړي.

په ليک کې د طالبانو د هغو هدفي وژنو يادونه هم شوې ده، چې طالبان يې د ټولنې د روښانه برخې د مخکښانو خلاف ترسره کوي او تر اوسه يې ګڼې پېښې په دې برخه کې کړي دي.

داوړ دا غوښتنه هم کړې ده، چې د افغانستان ګاونډيان دې د افغانانو په وړاندې د خپلو پولو پرانيستې ته مجبوره کړل شي، څو له خطر سره مخامخ کسان او ناورین ځپلي له هېواده ووتلای شي.

طالبانو د ښاغلي داور دغه ليک ته کوم غبرګون نه دی ښودلی.