تاند (جمعه، د قوس ۱۹مه) نیوزیلنډ د پنجشنبې په ورځ / دسمبر ۹مه/ اعلان وکړ د ځوانانو له لوري د سېګرېټو رانیول منع کوي.
دا د نیوزیلنډ د هغه پلان یوه برخه ده چې غواړي تر ۲۰۲۵ پورې خپل هیواد په بشپړ ډول د سیګرېټو له شره خلاص کړي.
د نیوزیلنډ د حکومت د نوي اعلان پر اساس به هغه کسان، چې له ۲۰۰۸ م کال وروسته زېږېدلي دي، اجازه نه لري چې په خپل ټول عمر کې سیګرېټ او تمباکو په بیه واخلي.
همداراز په پام کې ده چې د لویانو د سیګرېټو د نیکوتن اندازه کمه شي.
خو ټاکل شوې ده چې دا قانوني لایحه له راتلونکي کاله، چې یوازې ۲۰ ورځې ورته پاتې دي، عملي شي.
روغتیايي چارواکو او د تمباکو ضد کمپاینرانو د دې اقدام هرکلی کړی او ویلي یې دي چې دا به په نړۍ کې د تمباکو د صنعت پر ضد تر ټولو سخته کاروايي وي.
نیوزیلنډ له وړاندې څخه لا د سیګرېټو لپاره خورا لوړه مالیه ایښې وه، خو د روغتیا وزارت یې ویل چې په مالیو یې هیواد له سیګرېټو پاکېدای نه شي.
د نیوزیلنډ د روغتیا وزیرې ډاکترې عایشې ویرال د سیګرېټو په اړه د حکومت پرېکړې ته په اشارې ویلي:»«دا زموږ د خلکو د روغتیا لپاره یوه تاریخي ورځ ده.»