تاند:( يکشنبه، د قوس څوارلسمه)‏ ‏‏د جاپاني الاصله افغان ډاکټر ناکامورا د وژل کيدو دویم تلین په داسې مهال پوره شوی، چې طالبانو يې د قاتلانو د نیولو ژمنه کړې ده.

ناکامورا شاوخوا ۳۰ کاله د افغانستان په ختيځ کې کونړ سيند ته څېرمه د افغان اوبو د مدیریت لپاره سترې هڅې وکړې، چې په پايله کې يې لسګونه زره جریبه ځمکه له اوبو برخمنې او د پراخو حاصلاتو جوګه شوې.

هغه په افغانانو کې له خاص احترام څخه برخمن او په « کاګا مراد» مشهور و.

د ناکامورا د وژل کيدو پړه ځایي خلکو په ګاونډي هیواد پاکستان اچوله، ځکه په باور یې دغه هېواد هیڅکله هم د کونړ سيند د اوبو مدیریت نه شي زغملای.

له طالبانو سره د پاکستان پېچلو او ژورو اړيکو ته په کتو سره، طالبان تورنيدل چې ناکامورا دوی وژلی.

طالبانو بيا دا ادعاوې نه دي منلي.

اوس يې يوه وياند احمد الله وثیق خو لا د ناکامورا د قاتلانو د نیولو ژمنه هم کړې ده.

پر طالبانو حلک نيوکه لري، چې له ډېرو پېښو وروسته، د مخکيني حکومت په شان د عاملينو د نيولو ژمنه کوي، خو په عمل کې يې کومه پايله نه لیدل کیږي.

د طالبانو له واکمنیدو سره، په افغانستان کې سلګونه تنه د جمهوري نظام منسوبین او پلویان او عام خلک وژل شوي، اختطاف شوي، يا يې کورونه جوړ شوي، خو د عاملانو د نیولو او مجازاتو په اړه يې د طالبانو اقدامات قانع کوونکي نه ښکاري.