تاند:( چارشنبه، د قوس لسمه)د افغانستان پخواني ولسمشر حامد کرزي له روسيه هېواد څخه په دې مننه وکړه، چې ۳۰۰ افغان محصلین یې د زده کړو لپاره خپلې خاورې ته انتقال او افغانستان سره ۳۶ ټنه بشري مرسته واستوله.
کرزي پر خپلې ټویټر پاڼې لیکلي، چې په روسيه کې د تحصيلي بورسونو لپاره د بریالي شويو افغان ځوانانو ليږد پر وخت او د هېواد په ګټه ګام دی.
حامد کرزي دغه راز، روسيه ته د ورغلو تازه دمه افغان محصلینو څخه غوښتي، چې په ښه توګه خپلې زده کړې مخته يوسي.
ښاغلي کرزي همدا شان له روسيه هېواد څخه غوښتي، څو له افغانستان سره خپلو بشري مرستو ته دوام ورکړي.
د روسیې د دفاع وزارت «درې (IL-76) پوځي ترانسپورتي الوتکو د کابل په هوايي ډګر کې د بشري مرستو بار کښته کړ او له افغانستانه د کسانو د ایستلو لپاره په دغه هوايي ډګر کې انتظار دي. ټولټال ۳۶ ټنه بشري مرسته دغو الوتکو کابل ته رسولې ده.»
په خبرپاڼه کې دغه راز ویل شوي چې د روسیې د ولسمشر ولادیمیر پوتین په امر، دفاع وزیر سرګی شویګو له افغانستان څخه د روسیې د فدراسیون او د ډله ییز امنیت ټولنې د غړیو هیوادونو د ۳۸۰ نورو اتباعو او د روسیې په پوهنتونونو کې په زده کړو د بوختو افغان محصلانو د ایستلو چارې تنظیم کړې.