تاند:( يکشنبه، د قوس اوومه) طالبان وايي، چې متحدو عربي اماراتو له کندهار سره د ۲۲۸ ټنو خوراکي توکو، غیر خوراکي توکو او درملو مرسته وکړه.
د کندهار لپاره د طالبانو والي محمد یوسف وفا پر نورو هېوادونو هم غږ وکړ چې د افغانانو ترڅنګ ودریږي او له افغانانو سره بشري مرستو ته دوام ورکړي.
طالب چارواکو د دې مرستو د وېش په اړه څه نه دي ويلي.
د دوی له واکمنیدو سره په افغانستان کې ژور اقتصادي او بشري ناورين رامنځته شوی او تر ۲۴ میلیونه پورې افغانان ډوډۍ نه لري.
د طالبانو رييس الوزرا مولوي محمد حسن اخوند تېره شپه له ملي ټلويزيون څخه په خپله خپره کړې لومړۍ غږيږه وينا کې ملت ته ويلي، چې دوی ورسره د ډوډۍ او رزق ژمنه نه وه کړې.
حسن اخوند له ملت څخه وغوښتل، چې د ده په ټکيو ( خدای ته په بغارو شي) څو ډوډۍ ورته مساعده کړي.
د هغه دغو څرګندونو په ټولنیزو رسنیو کې توند غبرګونونه پارولي دي.
د طالبانو مطبوعاتي مبلغينو بيا ويلي، چې حسن اخوند په ولسي او ساده ژبه ملت ته ريښتيا- ريښتيا خبرې وکړې او د دروغو وعدې یې ورنه کړې.