تاند:( شنبه، د قوس شپږمه) طالبان وايي، چې يو ترکي پلاوی به کابل ته راځي څو په افغانستان کې د پانګونې فرصتونه وڅېړي.
د طالبانو د يوې اعلاميې له مخې، د دوی د ریاست الوزرا سیاسي مرستیال مولوي عبدالکبیر نن غرمه په افغانستان کې د ترکیې له سفیر جهاد ارګین سره په سپېدار ماڼۍ کې وکتل.
سرچينې ويلي، په دې کتنه کې د ترکیې سفیر وویل چې دوی د سرې میاشتې په مټ افغان کډوالو او بېځایه شویو ته مرستې رسولي او د مرستو یاده لړۍ لا هم دوام لري.
هغه زیاته کړه چې ترکیه له کرنې وزارت سره د اصلاح شوي تخم مرسته کوي او په قندهار، هرات او کجکي ولسوالۍ کې به د هغو عمراني پروژو کار چې ترکیه یې تمویلوي، دوام وکړي.
د ترکیې سفیر څرګنده کړه؛ د ترکيې پانګه وال په افغانستان کې پانګونې ته لېواله دي چې یو شمېر به یې په راتلونکي اوونۍ کې افغانستان ته سفر وکړي.
مولوي عبدالکبیر په دې ليدنه کې د افغانستان او ترکیې مناسبات لرغوني او دوستانه وبلل.
هغه وویل چې ترکیه تل د متحد افغانستان غوښتونکې ده.
نوموړي زیاته کړه چې افغانستان د ټولو هېوادونو په ځانګړي ډول د ترکیې مرستو او همکاریو ته اړتیا لري او طالبان غواړي چې ترکیه په افغانستان لا زیاته پانګونه وکړي.
مولوي عبدالکبیر په افغانستان کې د تیکا موسسې فعالیتونه وستایل او د دغه بنسټ د لازیاتې مرستې غوښتنه یې وکړه.
هغه څرګنده کړه؛ هغه ښځې چې په بېلابېلو ادارو لکه پاسپورټ ریاست، هوایي ډګر او د روغتیا سکتور په برخو او په اکثره ولایتونو کې د نجونو په ښوونځیو کې کې کار کوي، فعالې دي.
د ده په وینا؛ د نوې تعلیمي طرحې په بشپړولو سره به په راتلونکي کال کې په ټول هېواد کې د نجونو ښوونځي بېرته پرانیستل شي.
ترکيې د نړۍ د ټولو هېوادونو په شان، په افغانستان کې د طالبانو واکمني په رسميت نه ده پېژندلې، خو سفير یې په کابل کې موجود دی او وخت په وخت طالب چارواکو سره لیدنې کتنې لري.