تاند:( يکشنبه، د عقرب دېرشمه) راپورونه وايي، چې د پنجشېر ولايت په رخه ولسوالۍ کې نن د ملکي وګړو پر موټر ماین چاودلی دی.
د خبري رسنيو په حواله، په دې چاودنه کې ۲ ملکي وګړي ټپيان شوي دي.
ځايي خلکو ويلي، چې دا ماين داعش ډلې د طالبانو د الوزولو لپاره خښ کړی و، خو ملکیان پرې برابر شوي دي.
ويل کيږي، چې په چادونه کې د موټر چلوونکی او د هغه شاګرد ټپیان شوي دي.
داعش ډلې او طالب چارواکو په دې اړه څه نه دي ويلي.
په افغانستان کې د ملګرو ملتونو د سرمنشي ځانګړې استازې بیا تېره اونۍ، د افغانستان په اړه د نړیوالې امنیت شورا ځانګړې غونډې ته وویل، چې داعش ډله د افغانستان ۳۴ واړو ولایتونو ته رسیدلې او طالبان یې پر وړاندې مبارزه کې نه دي بریالي شوي.
طالبان بیا داعش ډله دوی ته ګواښ نه ګڼي او د فعالیتونو د زیاتیدو په اړه خبرې یې بې ځایه رسنیز تبلیغات بولي.
دا په داسې حال کې ده، چې نیږدې هره ورځ د افغانستان له مختلفو سیمو د یادې ډلې د فعالیتونو او پر ضد یې د طالبانو د اقداماتو خبرونه ورکول کیږي.