تاند:( يکشنبه، د عقرب دېرشمه)‏‏ راپورونه وايي، چې د طالبانو د اطلاعاتو او فرهنګ وزارت په طلوع نيوز کې د خپل سياسي دفتر د وياند ډاکټر نعيم وردګ له پروني ناندريز بحث څخه وروسته نن له رسنيزو مسوولینو سره په کابل کې اعتراضيه غونډه کړې ده.

ويل شوي، چې په دې غونډه کې د طالبانو د امر بالمعروف او نهی عن المنکر وزير شېخ محمد خالد، د طالبانو د اسلامي امارت وياند او د اطلاعاتو او فرهنګ وزارت نشراتي مرستيال ذبيح الله مجاهد او يو شمېر نورو چارواکو رسنيو ته د خپلو اعتراضونو د شريکولو ترڅنګ له دوی څخه خپلې غوښتنې ډاګيزې کړي دي.

طالب وياند ذبيح الله په دې غونډه کې د رسنیو استازو ته ويلي:‏رسنۍ د منبر حیثیت لري، دوی باید داعیین الی الخیر وي او هیله مو ترې داده، چې د نوي نسل او عام اولس د اذهانو د تنویر په برخه کې ښه رول ولوبوي.

د طالبانو د امر بالمعروف او نهی عن المنکر وزير بيا د رسنيو مسوولينو ته ويلي:‏اسلامي امارت ستاسی حمایت کوي، ستاسی مشکلاتو ته رسیدګي کوي او له تاسي څخه د هیواد او اسلامي نظام د ارزښتونو په اړه د مثبتو نشراتو هیله لري.

معلومه نه ده، چې د طالبانو تر کنټرول لاندې د افغان رسنيو مسوولينو د طالبانو په دې استحضايه غونډې کې دوی ته څه ويلي؟

پرون د طلوع نيوز ټلويزيون په يوه لايف بحث کې د کابل پوهنتون د استاد فيض الله جلال او د طالبانو د قطر دفتر د وياند ډاکټر نعيم وردګ تر منځ لفظي شخړه وشوه، چې ترې وروسته د طالبانو يو شمېر چارواکو او پلويانو جلال د طالبانو امارت ته په سپکاوي تورن او هم د طلوع نيوز پر ضد د اقداماتو غوښتنه وکړه.

طلوع نيوز د طالب چارواکو د نننۍ غونډې په اړه تر اوسه څه نه دي ويلي.