تاند:( پنجشنبه، د عقرب اووه ویشتمه )په کابل کې د روسیې سفیر دیمیتری ژیرنوف وایي، چې د هېواد د بشري مرستو لومړۍ محموله به یې نن افغانستان ته ورسیږي.
د ټاس خبري اژانس په حواله، دا مرسته به د روسیې د دفاع وزارت په یوه الوتکه کې کابل ته ورسول شي.
د ژیرنوف د معلوماتو له مخې، په دې محموله کې ۳۶ ټنه خوراکي، روغتیایي او نور اړین توکي شامل دي.
روسي سفیر ویلي، چې طالب چارواکو د دې مرستو په شفاف ډول د مرستو د وېش ډاډ ورکړی.
نوموړي دا هم ویلي، چې دغه الوتکې به له کابل څخه د ستنیدو پر وخت په افغانستان کې ایسار پاتې روسي اتباع او ۹۰۰ افغان محصلین روسیې ته ولیږدوي.
د طالبانو له نیږدې متحدینو پرته نور ډېر هېوادونه د نړیوالو بشري ادارو په وسیله له افغان فقر ځپلو سره مرستې کوي.
خو د روسیې، چین او منځنۍ اسیا د ځينو هېوادونو په شان چې حکومتونه یې طالبانو سره ښې اړیکې لري، خپلې مرستې په مستقیم ډول طالبانو ته سپاري.
ویل کیږي، چې طالب چارواکي د مرستو په وېش کې سلیقوي اړیکې پالي او د خپلو جنګیالیو او خواخوږو په کورنیو بهرنۍ بشري مرستې وېشي.
طالب چارواکو بیا دا تورونه رد کړي دي.