تاند:( پنجشنبه، د عقرب اووه ویشتمه ) د کابل په شمالي برخه خیرخانه کې پرون ماښام د درنې وسله والې نښتې خبر ورکړل شوی.
خبري سرچینو ویلي، چې په نښته کې له درنو وسلو هم استفاده شوې او خلک سخت وېریدلي دي.
د طالبانو ځینو خبري سرچینو بیا ویلي، چې هلته یې د داعش وسله والو پرضد عملیات کړي او یو شمېر داعشیان یې وژلي دي.
طالبانو د مقابل لوري د مقاومت له کبله د خپل لوري د مرګ ژوبلې په اړه څه نه دي ویلي.
نیږدې میاشت مخکې هم په خیرخانه کې پوره شپه د ورته نښتې او دوه اړخیزې مرګ ژوبلې خبر ورکړل شوی و.
څو ورځې وړاندې د کندهار ښار او یو شمېر ولسوالیو کې هم طالبانو د داعش ډلې پر ضد د عملیاتو او څو تنو د وژلو او نیولو خبر ورکړی و.
ویل کیږي، چې هلته هم دوی د داعشیانو له سخت مقاومت سره مخ شوي وو.
داعش ډلې په دې اړه رسنیو ته څه نه دي ویلي.
د روسیې د ملي امنیت شورا یوه مقام په تازه وینا کې طالبان ننګولي، چې که خپل قوت د ترهګرو ډلو پر وړاندې ثابت نه کړي، واکمني به یې ناکامه او افغانستان به یوې سختې کورنۍ جګړې ته ستون شي.
طالبان بیا د نړیوالو د سختو اندیښنو باوجود، داعش ډله جدي ګواښ نه ګڼي او د ځپلو د وړتیا ادعا یې لري.
دا په داسې حال کې ده، چې ورځ تربلې د یادې ډلې د فعالیتونو د پراختیا او زیاتوالي خبرونه ورکول کیږي.