تاند، دوشنبه، د ثور ۲۹مه: د صلاح الدین رباني په مشرۍ د جمعیت اسلامي ګوند له عبدالله څخه لارې جلا کړې او ویلي یې دي چې دوی د سیاسي هوکړې برخه نه دي.
جمعیت ګوند د تېر کال د میزان د میاشتې په ولسمشریزو ټاکنو کې د عبدالله ملګری و او عبدالله هم د دغه ګوند نوماند و، خو اوس چې ولسمشر غني عبدالله عبدالله د مصالحې عالي شورا رئیس ټاکلی دی نو په غبرګون یې جمعیت ګوند ویلي، چې اوسنی حکومت قانوني او مشروع ندی.
جمعیت ویلي، چې د هوکړې په ترڅ کې د یو غیر متمرکز نظام د رامنځته کېدو غوښتنه دوی هم لرله خو اوسني توافق کې عبدالله د نظام تمرکز او ټاکنیزو پایلو ته مشروعیت ورکړ چې په دې کار سره یې د ګوند سره خطونه مات کړي دي: ((موږڅوکۍ نه غواړو خو د صدارتي نظام د رامنځته کولو لپاره به هڅو ته دوام ورکړو.))
دا په داسې حال کې ده چې عبدالله عبدالله بیا نن په یو پیغام کې د تېرې ورځې سیاسي هوکړه د خیر څخه ډکه بللې او ویلي یې دي چې ټاکنیز بحران نور پای ته رسېدلی دی.