تاند- په خورا لوی توپیر سکاټلنډ ته د هند ماتې نیمه پایلوبې ته د دغه هیواد د ملي لوبډلې د رسېدا هیلې خورا ډېرې کړي دي.
اوس د دوهم ګروپ ټولو لوبډلو ۴ سیالۍ کړي، په دې تفاوت چې افغانستان باید له نیوزیلنډ سره، چې غښتلې لوبډله ده، سیالي وکړي خو هند له نامیبیا سره، چې کمزورې ګڼل کېږي. د دغو سیالیو پایله د دوهم ګروپ دوهم ټیم به معلوم کړي.
له نامیبیا په نسبتاُ ډېر توپیر د هند بری به دا هیواد نیمه پایلوبې ته په هغه صورت کې ورسوي چې افغانستان نیوزیلنډ مات کړي.
حاضردمه نیوزیلنډ له ۴ سیالیو ۳ ګټلي، افغانستان له ۴ سیالیو دوې ګټلي او هند هم له ۴ سیالیو دوې ګټلي دي.
د افغانستان او نیوزیلنډ سیالي د هند لپاره خورا مهمه ده.
که افغانستان په ډېر توپیر نیوزیلنډ ته ماتې ورکړه، هیله شته چې افغانستان نیمه پایلوبې ته ووځي.